Psa 110 | KYG | STEP | Ala kava ne'mo'a Ala kava ne'nie'mo, lamaga nahaopale'mo faika maime maime ne'uge'nao kame vayakamo ali'na kaiya afe'alumelaga apateno, huno ha pai'niye.

Psalms 110

Ala kava ne'mo'a Ala kava netie'mo ha pai'niya gemae

1 Ala kava ne'mo'a Ala kava ne'nie'mo, lamaga nahaopale'mo faika maime maime ne'uge'nao kame vayakamo ali'na kaiya afe'alumelaga apateno, huno ha pai'niye. 2 Ala kava ne'mo'a kayoteti'mo yagaika apatesana himamukamo Saiyoni taonifati'mo alino atesigeno ugiye. Kame vayakamogi folagapi'mo mai'neka yagaika apato, huno kaha pai'niye. 3 Himamukaleti'mo hisana afina'mo vayakamogimo apaipafati'mo hapau'nisige'a apakufamo kamite'a apaote konali kukenamo ali'a vaite'a kakame hugae. A'nemogimo apaipa kupati'mo mafa'nemo ali'a ne'ataya kava huno netepi'mo lao'ya'mo nelamiye. Ani kava huno Goti'a neya vayakamo alino apatesige'a lao'yakana hu'a afole aite'a kagaetegamo ugae. 4 Ala kava ne'mo'a aipa agesamo alino afe oleno ago'yamo ataleno ge huno'ae'mo, Melikiseteki'a mono huno ne'ateya vekamo mai'niya kava huka agae akamelegati'mo agae nofi vekamo mono huka ne'atana vekamo mai'neka muki afina'ae'mo maige maige huka maigane, huno kaha pai'niye.

5 Ala kava ne'mo lamaga kahaopale'mo mai'niye. Agaemo aipamo leno apatesiya afina'mo kini vaya'mo alagi apamagigiye. 6 Agaemo muki alu nofi vaya alu nofi vaya'mo alino fako huno apateteno kamiti apamagisige'a falite'apae'mo apakufa'amo mopafi'mo asagau'a aigae. Agaemo muki haopalega mai'naya kini vaya'aife'mo kame huno apateteno huno aeno apakasegaiye. 7 Kategamo ne'uno'ae'mo ka agi'nale'mo hane'niya anipati'mo negaiya'mofe'mo he tino lokiya vaino aeno apakasegaiye.